INDRAMAYU, AYOBANDUNG.COM – Saurang lalaki pasién Covid-19 (43 taun) asal Kecamatan Lohbener, Kabupaten Indramayu, deudeuh teuing antukna maot di jalan. Saméméhna dianter ku kulawargana, si pasién kukurilingan ka lima rumah sakit maké mobil dolak, tapi taya hiji gé rumah sakit nu narima, alias parinuh kabéh.

Èta kajadian poé Salasa, 15 Juni 2021. Si pasién memang kakonfirmasi positif Covid-19. Kondisina rada ripuh, si pasién geus sesek napas.

Kepala Puskesmas Lohbener, Uswatun Hasanah, nétélakeun memang bener kondisi pasién harita geus ripuh. Basa dilakukeun rapid tés antigén, hasilna positif Covid-19. Pihak puskésmas, tuluy ngusakakeun néangan RS rujukan covid 19 nu kosong. "Leres, poé kamari RS sadayana pinuh," ceuk Uswatun, Rebo, 16 Juni 2021.

Ceuk Uswatun, pihak puskésmas harita kénéh geus méré nyaho ka kulawarga pasién ngeunaan kondisi ruang isolasi di RS nu pinuh. Pihakna ogé geus méré palayanan maksimal bari ngadagoan informasi ngeunaan aya heunteuna RS nu bisa ngarawat pasién. Ngan, harita kénéh pihak kulawarga pasién boga inisiatif mawa pasién kukurilingan néangan RS nu kosong kalawan maké mobil dolak.

Uswatun ogé nétélakeun, pihakna ogé sabenarna geus nyiapkan mobil ambulans pikeun ngarujuk pasién ke RS. Ngan, tetep harita manéhna can meunang informasi aya rumah sakit nu kosong. Pek téh memang harita taya hiji gé rumah sakit rujukan nu bisa narima pasién Covid-19 anyar.

"Daripada nungguan lila, ahirna pihak kulawarga pasién boga inisiatif néangan rumah sakit sorangan," ceuk Uswatun.