LENGKONG, AYOBANDUNG.COM – Usum pandemi. Jelema loba cicing di imah. Tamba kesel, ngeusian buruan imahna ku pepelakan tanaman hias. Ibu-ibu nu katingali nu gandrung mah, tapi teu saeutik ogé bapa-bapa.

Kang Anang (25), nu boga gerai tanaman hias di Jalan Soekarno-Hatta, Kota Bandung, nyebut, aya 4 jinis tanaman hias nu panglobana ditanyakeun, di antarana.

1. Tanaman Kupu-Kupu 
Tanaman Kupu-Kupu biasa ogé disebut Butterfly.Ngaran latinna Oxalis Triangularis. Ngarawatna gampang. Matakna loba néangan.

Daunna warna ungu, siga kupu-kupu. Lucu. Lian ti éta Butterflyboga kembang laleutik siga anggrék, seungit.

Tanaman hias kupu-kupu atawa Oxalis triangularis. (Ayobandung.com/Iis Muslimah/magang)

Unik, lamun ti peuting, daunna nutup sorangan. Ngabuka atawa hudang deui lamun isuk-isuk. Kumaha wé jiga jelema saré.  

Bisa disimpeun di jero atawa di luar rohangan. Mangkadé kudu kacahayaan. Lamun henteu, hésé ngagedéan. Tapi, tong kacahayaan panonpoé langsung bisi daunna layu tuluy garing. Alusna mah simpeun Oxalis triangularis di rohangan nu caang.

Tanaman hias begonia polkadot. (Ayobandung.com/Iis Muslimah/magang)

2. Begonia Polkadot 
Salian Tanaman Kupu-Kupu, si geulis Begonia Polkadot ogé loba nu néangan. Ngaran ilmiahna Begonia Maculata, tanaman hias ieu boga daun nu gomplok, tapi ari dahanna leutik. 

Tanaman hias begonia polkadot atau Begonia maculata. (Ayobandung.com/Iis Muslimah/magang)

Daunna siga jangjang malaikat alias guardian wingsnu aya titik-titik bodas dina tonggongna. Lantaran titik-titik éta, tanaman ieu disebut Begonia Polkadot

Hargana teu mahal teuing. Ngarawatna gé teu ribet. Nu penting perhatikeun kacahayaan teu. Pastikeun kudu kacahayaan méh tumbuhna maksimal.  

Tanaman hias lili paris. (Ayobandung.com/Iis Muslimah/magang)

3. Lili Paris
Lili paris sederhana tapi lucu. Simpel. Daunna ngarumbay panjang. Tungtungna aya garis bodas, nambahan jadi éksotis. 

Tanaman hias lili paris. (Ayobandung.com/Iis Muslimah/magang)

Lili Paris biasana mah disimpeun di jero rohangan. Rohangan katingalina jadi éndah, seger. Ceunah, tanaman ieu gé bisa ngabeursihkeun udara tina senyawa nu némpél dina benda nu dibawa ti luar imah. 

Tanaman hias Begonia Karpet Merah. (Ayobandung.com/Iis Muslimah/magang)

4. Begonia Karpét Mérah
Hiji deui tina jinis begonia nu loga ditéangan téh, nyaéta Begonia Karpét Mérah. Ngaran kerénna Begonia Red Carpet Turk. 

Unik, daunna buleud. Tonggong daunna nu warna beureum lamun dicabak karasa aya bulu-bulu alus mirip karpét. Sisi daunna gé warna beureum.

Tanaman hias Begonia Karpet Merah. (Ayobandung.com/Iis Muslimah/magang)

Begonia nu siga kieu hargana mahal sabab kaasup tanaman langka. Daunna geulis, kombinasi tina warna héjo jeung beureum kalem. Loba nu raresepeun. (Iis Muslimah/magang)