CIANJUR, AYOBANDUNG.COMBuaya muara hideung nu panjangna 1,5 meter, beuratna 10 kilogram ahirna katéwak ku opat nalayan asal pantai laut Cianjur, Rebo (24/3/2021) peuting. Éta buaya nu salila ieu “ngaresahkeun” téh mémang biasa sok katingali mucunghul di Muara Cikawung Desa Karangwangi, Kecamatan Cidaun, Kabupaten Cianjur.

Warga Muara Kawung—utamana nalayan—atoh kacida meunang béja buaya éta katéwak. Sabab, salila sabulan ieu maranéhna sieun ngalaut alatan sok katingali aya buaya mucunghul.

Mimiti na mah éta opat urang nalayan téh rék ngala lauk. Tapi, katingali aya “panampakan” buaya nu aheng dicaritakeun ku warga, Rebo (24/3/2021). Harita tabuh 9 peuting.

Kabeneran mawa tambang, ngawani-wani manéh, opat nalayan éta téh ngeurad éta buaya maké tambang. Usahana hasil. Buaya nu warnana hideung téh kaeurad. Tuluy digusur ka sisi.

Kepala UPTD PPI Cidaun, Eli Muslihat nétélakeun ayana nalayan nu néwak buaya di Muara Cikawung. “Enya, sanggeus buayana ditéwak, maranéhna lapor ka dieu. Mémang salila ieu éta buaya téh ‘ngaresahkeun’ warga, utamana nalayan,” ceuk Eli ka wartawan, Kemis (25/3/2021).

Sanggeus narima laporan éta, patugas Polsek Cidaun jeung BBKSDA Jabar Resort Gunung Simpang harita kénéh langsung ka lokasi.

“Nepi di lokasi, buayana geus ditalian. Tuluy eta buaya teh dibikeun ka ka pihak berwenang nyaeta, nyaéta BBKSDA Jabar," ceuk Eli.